بداية بتتضمن هذي التدوينه :
1- مدة الرحلة.
2- خط سير الرحلة.
3- الطقس واهم المدن والمناطق.
4- الفنادق والسكن .
5- طريقة التنقل .
5- الاماكن السياحيه والمطاعم .
6- جدول سياحي.
ــــــــــــــــــــــــــــــــــــــــــ
الرحله كانت لمدة 19 يوم من الدمام على مطار مالبينسا - ميلان.
ـــــــــــــــــــــــــــــــــــــــ
خط سير الرحله:
من مطار مالبينسا اتجهنا على طول الى كومو (3 ايام ) - من كومو الى سويسرا تحديداً وينقن (4 ايام) \ والينسي ( يومين ) - من والينسي الى اورتيساي ( شمال ايطاليا) (4 ايام ) - من اورتيساي الى فيرونا (3 ايام) - من فيرونا الى اخر محطة وهي ميلان (3 ايام) ومنها الى مطار مالبينسا للعوده.
الشمال الايطالي يزيد بروده كل ما اتجهنا للشمال جهة جبال الدولوميتس تكون درجة الحرارة بين 10-25 درجة مئوية, وكل ما نزلنا للجنوب الشمالي جهة فيرونا وفينيسيا ترتفع درجة الحرارة.
ـــــــــــــــــــــــــــــــــــــــ
- اقليم تيرول South Tyrol -
طبعاً اتجهنا من قرية والينسي في سويسرا الى جنوب تيرول في الشمال الايطالي, وهي القرى المطلة على جبال الدولوميتس الي تعتبر جزء من جبال الالب.
اول وجهة لنا في قرى الشمال الايطالي هي قرية اورتيساي الي اخذنا السكن فيها, اشوفها من اجمل القرى.. جوها رائع يميل للبروده, فيها طبيعه وشراحة والسنتر حقها وسيع صدر ومرتب وفيه مجموعة مطاعم ومقاهي تخدمكم وميزتها قربها من باقي قرى الشمال الي يسمح لكم تزورونها وترجعون بنفس اليوم.
ومرينا خلال الفترة بهذه القرى:
اورتيساي
برونيكو (تبعد ساعة عن اورتيساي)
سان كانديدو
سانتا مادلينا (تبعد 40د عن اورتيساي لكن ما اشوف فيها شي مميز)
بولزانو
طبعاً افضل طريقة لاستكشاف المنطقة هي السيارة.
السكن :
,لقينا في اير بي ان بي شقة اسمها Markus Apartment
اطلالتها ساحرة لكن يعيبها شيئين الاثاث القديم وانعدام الخصوصية لان الشقة المجاورة فيه بلكونة لكن مافيه بيننا وبينهم حتى حاجز يعني كانها بلكونه مشتركة!
الشقة مناسبه للي معاهم سيارة فقط لانها مرتفعه وتبعد نص ساعة مشي عن السنتر وطلعة جبل متعبه..
السكن الثاني في مدينة فيرونا كان Residence all'Adige
نظيف ومرتب وموقعه ممتاز مطل على نهر اديجي, انصح فيه
جدول لمدة 7 ايام :
-
يوم ١: يوم الوصول, استكشاف لقرية اورتيساي, تمشيه في السنتر ( مرفقه صور له بالاسفل جميل حتى في الليل ) والعشاء في السنتر في المطعم اللذيذ الي تعشينا فيه مرتين :) mauriz keller. (افضل اطباقهم شوربتهم الخاصة, البيتزا والريزوتو). وضروري تجربون الكريب الي في السنتر.
يوم 2: فطور في الفندق او في سنتر اورتيسي في مقهى Corso طبعا مخبوزات وحلى فقط مايعترفون باطباق الفطور.
بعد الفطور التوجه بالسيارة الى بحيرة Lago de braies , بحيرة رائعة تحيطها جبال الدولوميت وفيها قوارب تجديف، الدخول لها يتطلب حجز من موقعهم الالكتروني هنا, تحتاجون حجز تذكرة باركنق للسيارة وتختلف حسب بُعد المواقف عن البحيرة اخذنا الي يبعد ٢٠٠ متر ب ١٨€ وبعدها تنزلون مشي للبحيرة ، فيها ركوب قوارب تجديف ب ٢٥€ نص ساعه, السعر ل ٤ اشخاص لكن نصيحه التجديف ممتع بس متعببب فما انصح تاخذون وقت اكثر. بعد البحيرة التوجه الى بلدة برونيكو تبعد نص ساعه عن البحيرة و ساعه عن اورتيسي, البلدة نوعاً ما اكبر من اورتيساي و السنتر فيه محلات كثيره مثل زارا ومانجو... وبعدها عشاء في مطعم pizza viva (ماجربته لكن قرأت عنه تقييمات عاليه)
يوم 3: فطور في الفندق او في سنتر اورتيساي, والانطلاق بعدها لزيارة قمة جبل
seceda وهي قمة مشهورة لهواة التزلج في الشتاء واطلالتها جميلة, فيها تلفريك في قمة الجبل مطل على القرى المقابلة (الي هي اورتيساي وسان مادلينا) سعر ركوب التلفريك ٢٥-٤٥ € للشخص. ممكن تتغدون او تحتسون القهوة على قمة الجبل. بعدها عودة لسنتر اورتيساي وقهوة او عشاء في CASCADE على الغروب و تمشيه في زقاق السنتر الجميل.
يوم 4: جدولنا كان زيارة قرية سانتا مادلينا تبعد 45د وقرية كورفارا, لكن اشوف الاماكن مكرره ولا تستاهل المشوار فممكن زيارة بلدة بولزانو بدالهم.
- فيرونا Verona -
طبعاً اتجهنا من تيرول ( اورتيساي) الى بلدة فيرونا, السبب في اختيار فيرونا قربها من فينيسيا (ساعه ونص بالسيارة) بحيث تقدرون تروحون لها وترجعون في نفس اليوم, وبرضو قربها من ميلان الي هي اخر محطة في الرحلة (تبعد عنها ساعتين بالسيارة).
بالنسبة للجو في فيرونا في شهر اغسطس يعتبر حار نسبياً بين ال 20-30 درجة ولطيف في الليل .. المدينة هذي ذكرتني شوي في الطايف ما اري ليه صراحه بس تشبه جوها وشهابة طبيعتها, اما الجو في فينيسيا كان احر ورطوبة غريبه.. بس مهما كان جوها ضروري تزورونها لو يوم لانها عجيبه.
فيرونا كانت " مسرحاً لأحداث رواية شكسبير الشهيرة "روميو وجولييت"". ولو حابين تقرأون اكثر عن فيرونا تفضلوا هذا الرابط
نرجع نستكمل الجدول لباقي الايام:
يوم 5: التوجه الى السكن في فيرونا ( بالسيارة تبعد ساعتين تقريباً), ولكم حرية الاختيار بين جدولين,
الاول: الاتجاه لبحيرة قاردا تبعد ٣٨ د عن ڤيرونا فيها قرية ليموني سول ( تشتهر بزراعة الموالح والليمون والزيتون) .
او زيارة ساحة برا Piazza Bra في الداون تاون, الساحة جميلة وممتنوعه بالمحلات وفيها براندات عالمية مثل لوي فيتون وبرادا... ممكن تتغدون اوتتعشون فيها.
برضو فيه مجمع تسوق اسمه ADIGEO, مجمع لطيف وفيه اغلب المحلات العالمية (فيه بريمارك وهذا كان هدف الزيارة صراحة).
يوم 6: يوم فينيسيا, تبعد عن فيرونا ساعه ونص بالسيارة.
طبعاً فينيسيا كلها قنوات مائية ومافيها اي سيارات تدخلها, فالسيارة بتضطرون توقفونها في مواقف سيارات بتطلعكم على الميناء تشترون منه تذاكر للفيري او الجندول (قارب خاص او تاكسي بحري) الي يوديكم لوسط فينيسيا, طبعاً اشهر محطتين هي محطة جسر الريالتو و محطة ساحة سان ماركو ممكن ينزلكم عندها.
وهذي بعض المواقف الي تقدرون توقفون سيارتكم فيها:
فينيسيا جميلة في النهار والليل فضروري تشوفونه في الوقتين, وهنا عندكم اشهر الاماكن في فينيسيا الي تستحق الزيارة:
-
Museo Correr "يعرض تاريخ وفن مدينة البندقية حيث يتخصص بالتاريخ التسلسلي لمدينة البندقية، ويعرض جميع أحداثها مكان جميل ومبنى ذو اعمدة مميزة ورائعة التصميم." التذكرة ب16$ للشخص لكن يسكر ٦م.
-
ساحة سان ماركو St. Mark's Square (قدام المتحف) ساحه مشهورة نتغدى فيها / عندها كنيسة سان ماركو. / قصر الدوج.
-
جولة بالجندول بين القنوات والمرور بجسر الريالتو.
-
وفيه اقتراح لزيارة جزيرة بورانو لكن ما زرناها ماكان فيه وقت ( تشتهر بأكثر مدينه ملونه في ايطاليا وتسمى بجزيرة الدانتيل لاشتهارها فيه) تبعد ساعه بالقارب عن فينيسيا.
-
وطبعاً الفقرة الاهم التسوق في ازقة فينيسيا تحديداً ريالتو (ملاحظة المحلات اسعارهم الدبل لانها بلدة سياح) و تجربة الجيلاتو المميز.
مطاعم مقترحه ومقاهي:
-
Gelato di Natura - San Giacomo dell'Orio محل جيلاتو وله اكثر من فرع
-
SUSO محل جيلاتو مشهور
-
مقاهي ساحة سان ماركوس (اسعارها مرتفعه لكن مكانها مميز وممتع للفرجة)
يوم 7: فطور في ELK Bakery والتوجه بعدها لملاهي قاردا لاند GardaLand, ملاهي حلوه وممتعه. تقدرون تحجزون تذاكرها من الرابط هنا.
سعر التذكرة تقريبا 39 يورو لحجوزات الاونلاين. وتختلف انواع الحجوزات حسب اذا كانت تشمل الاكواريوم او فقط البارك.