يا اهلاً وسهلاً , اتمنى تكونون بخير جميعاً..
في هذه الصفحه جميع مايخص قرية خيتورن بكل التفاصيل الي تحتاجونها بأذن الله .
: بتتضمن
-
عن المدينه والطقس
-
الفنادق والسكن.
-
طريقة التنقل .
-
الاماكن السياحيه .
-
المطاعم .
ــــــــــــــــــــــــــــــــــــــــــ
اول شي الرحله كانت على على الخطوط الهولنديه KLM من الدمام دايركت على مطار امستردام
- سخيبول schiphol -
اسعار الرحلات يتراوح مابين 1700- 3000 ريال باختلاف توقيت الحجز تتغير طبعاً.
مدة الرحله تقريباً 6 ساعات .
ـــــــــــــــــــــــــــــــــــــــ
القريه الساحره بجمالها وبطبيعتها الفريده .. قريه آمنه وغالبية سكانها كبار سن ,
عباره عن قنوات مائيه يحيط فيها بيوت خشبيه واكواخ
يُطلق عليها: "البندقية الهولندية"
جميع القنوات في القرية لا يتعدى عمقها متر.
الطقس في july النهار ربيعي وفي الليل يميل للبروده
درجات الحراره مابين 25 -12 (C°)
ـــــــــــــــــــــــــــــــــــــــ
Giethoorn
- Netherlands -
السكن :
قرية خيتورن جلسنا فيها لمدة 3 ايام واشوفها كافيه وحلوه للعوائل اما الازواج يومين كافيه
بحكم انها صغيره وممكن زيارة اغلب الاماكن والانشطه خلال يومين .
الي حاب يحجز اي سكن يتأكد من موقعه في الخريطه لان كثير مواقع تكتب ان موقع السكن في خيتورن ويكون خارجها اوفي قريه تعتبر بعيده عنها وتتطلب سياره.
اخذنا فيها منتجع اسمه Waterresort Bodelaeke حجزناه من airbnb وموجود برضو في بوكينق وبعض مواقع حجز الاوتيلات الثانيه بحيث لو كان الحجز غير متوفر في موقع جربو افتحوه من المواقع الثانيه يكون متوفر فيها وشاغر للحجز .. ارفقت لكم المنتجع على هذه الروابط :
BOOKING
AGODA
TRIP ADVISOR
وهذا موقع المنتجع نفسه فيه صور اوضح ومتوفره اللغه الانجليزيه للحجز
Waterresort Bodelaeke
هالمنتجع اقل مايقال عنه جميل!
فعلا من احلى المنتجعات الي زرتها بحياتي .. اطلالته رائعه عالبحيره ..
يبعد عن وسط قرية خيتورن تقريباً كيلو ويعتبر خارجها لكن تقدرون تروحون لوسط القريه مشي او بالسياكل .
اتوقع انه من اجمل الاماكن للسكن خصوصاً للعوائل مميزاته :
فيه خصوصيه لان الاكواخ الي امامنا ليست قريبه جداً.
المنتجع فيه امكانيه انكم تدخلونه بالسيارات فممتاز للي معاهم سياره . .
المنتجع كبير , جديد ونظيف جداً الفيلا دورين ومتوفره فيها كل الخدمات
من مطبخ وادوات طبخ الى المدفئه وغساله في غرفه خاصه للغسيل وحمامين .. طبعاً الفلل تكفي من 4-8 اشخاص على حسب الحجز لكن تختلف اماكنهم في المنتجع .
تقريباُ كان سعر الليله 1000 ريال ,
وتأمين بقيمة 200 يورو تدفع عند الوصول ويستردون لك المبلغ عند الخروج..
فيه تاجير سياكل وفيه مطعم مطل في نفس المنتجع يسكر الساعه 10 .
من الشروط عند الخروج طبعاً غسيل كل ادوات المطبخ المستعمله وترتيب الاسره وترجيع طاولة البلكونه لمكانها الاساسي ولو ماسويت هالاشياء مايطلعونك من الفيلا الا لما تتم 👏🏻.
غير كذا المنتجع صاير عباره عن بحيرات تختلف شوي عن بعضها لذلك انصح بالاكواخ الي على نفس البحيره الي سكنناها رقم الكوخ 409.
عيوب المنتجع مافيه روم سيرفز الشنط انت تشيلها بنفسك من والى خارج المنتجع - السياره مهمه في هالفقره فقط – وغير كذا مافيه بقاله الا سوبر ماركت واحد في وسط خيتورن تقريباً 10 -15 دقايق مشي .
من نظري السكن في وسط خيتورن يناسب للاجانب اكثر اولا مافيه خصوصيه لان القنوات الي بين الاكواخ كلها فيها قوارب وشركات سياحيه وناس تتمشى , غير كذا تحميل العفش اشوف الناس ينقلونه بعربات مشي بين القنوات ! لأن السيارات ماتدخل.
ارفقت لكم صور وبعض المقاطع صورتها للمنتجع ..
طريقة التنقل :
الذهاب :
اتجهنا من من مطار امستردام الى خيتورن (تبعد تقريباً ساعه ) عن طريق أوبر ب€300 يعني تقريباً 1000 ريال (سعره مرتفع لكن اريح بكثير ) والسبب في اننا ما استأجرنا سياره ان القريه عباره عن قنوات مائيه ولا تسمح بدخول السيارات فيها الا في خارج القريه
(القريه صغيره جداً فتقدرون تروحون لكل شي مشي او بالسياكل سواءً سكنتو في نفس المنتجع الي ارفقته او في داخل القريه ) واشوف ان السياره غير مستفاد منها الا للي بيجلس اكثر من 3 ايام وفي نقل العفش فعلا احتجناها .
العوده :
فكرنا نطلب اوبر لكن ما لقينا اي سيارة في القريه لذلك قررنا نرجع بالقطار او الباص
رحلات الباص المفترض تكون دايركت على سنتر امستردام لكن الوقت الي رحنا فيه كانت الرحلات ماتوصل للسنتر على طول فاضطرينا نركب باص من خيتورن ونزلنا الباص في محطة قطار - ومن محطة القطار نزلنا في محطة المترو وكل هذ وحنا معانا شناطنا نسحبها ! خذت الرجعه 3 ساعات بينما المفترض تاخذ ساعه طريق فقط صحيح متعبه لكن اوفر ب600 ريال
جولة القارب وسط خيتورن ..
انشطه واماكن تستحق الزياره :
اول يوم - يوم الوصول -
تمشينا رجلياً على الاماكن الي حولنا وتقضينا من السوبر ماركت الاقرب واتوقع الوحيد في خيتورن
spar supermarket عنوانه:
Eendrachtsplein 4, 8355 DL Giethoorn,
- ثاني يوم -
افطرنا بدري وطلعنا تقريباً على الساعه 10 نتقهوى ,
الساعه 12 رحنا نركب قوارب
هالوقت عندهم كانه بداية الصباح عندنا لان الشمس ماتغرب الا الساعه 10 الليل
!وهذا اكثر شي استغربناه اننا ننام والشمس ماغربت
,whisper boatاهم وامتع شي ممكن تسوونه تاخذون جوله بالقارب
طبعاً القوارب كهربائيه وسهله تسوقونهم انتم في الممرات المائيه من ساعه الى ساعتين وتلقونها قدام المطاعم عادة كل مطعم له مجموعة قوارب للتأجير , ممتعه جداً وتخليكم تشوفون القريه كلها وماحولها بتطلعون على بحيرات اكبر ومناظر جميله .
وللمعلوميه القنوات كلها عمقها مايتجاوز المتر ,
اسعارهم للساعه من35-20 يورو امشو وبتلقون ارخص تقريباًً تاخذ من 2-6 اشخاص
رجعنا وتغدينا في الفيلا واستأجرنا سياكل من نفس المنتجع 24 ساعه ب10 يورو
- اليوم الثالث -
تمشينا رجلياً وسط خيتورن وبين القنوات واكتشفنا القريه بعدها تغدينا في مطعم ورجعنا نستمتع في الفيلا لاخر ليله .
افضل المطاعم :
مطعم خراختوف (بنطقهم ) De Grachthof Restaurant Bootverhuu
عنوانه Binnenpad 54, 8355 BT Giethoorn, هولندا
من اكبر المطاعم في خيتورن وجلساته جميله ولهم قوارب خاصه بالمطعم , الاكل جداً لذيذ والخدمه ممتازه .. افضل مطعم ذقناه في خيتورن .
موقعه مرفق هنا في قوقل ماب
مطعم فراتيلي Ristorante Fratelli
عنوانه Binnenpad 113, 8355 BV Giethoorn, هولندا
موقعه وسط خيتورن مطل طبعاً على القناة تقهوينا فيه فقط لكن شفت له مدح على اكله ايضاً مطعم ايطالي مشهور بالبيتزا .
مرفق موقعه في قوقل ماب هنا وطبعا قوقل ماب فيه صور اكثر وتقييم للاكل والاسعار .
 |  |
|---|
مطاعم مقترحه لكن ماجربتهم:
موقعهم :
Binnenpad 68, 8355 BV Giethoorn,
مطعم ومقهى سميتز پاڤيلچوين Smit's Paviljoen
يعتبر من افخم مطاعم خيتورن واكبرها مطل على بحيرة Bovenwijde
يبعد عن المنتجع الي اخذناه 28 دقيقه مشي عالاقدام فبيصير اقرب لوسط خيتورن .
موقعه :
Binnenpad 29A, 8355 BR Giethoorn,